PRD: Doarjja julevsáme rámátjårggålibmáj

Sámedigge le dårjav juollodam 300 000 kråvnnåj Vuona rámátsæbrráj joarkátjit rámátjårggålimijn julevsábmáj.

Ođas | Almmuhuvvon

Ulmmen le ållidit jårggålimev Girkkojage rámáttevstajs ja joarkket jårggålimijn Oabme testamentas julevsábmáj.

Sámedikkeráde Mikkel Eskil Mikkelsen (NSR) javllá ájnas le oatsodit julevsáme prosjevtajt.

– Dárbbo le julevsáme rámáttevsta jårggåluvvi. Rámáttevsta sámegiellaj viehkedi nannit girkkov almulasj julevsáme giellaaddnen. Dát máhttá åvdedit julevsáme giela ja kultuvra dásev ja dahkat vaj julevsáme giella ja kultuvrra vuojnnu sebrudagán.

Jårggålimbargo baktu de julevsámegiella åvddån fágalattjat ja gielalattjat. Dajnas gå nuorra julevsáme jårggåliddje åhpaduvvi fágalasj bagádum hárjjidallama baktu, ja gå barggo julevsáme gielladåhkkidimijn ja báhkoboanndudagájn mierreduvvá julevsáme giellatjiehpijs.

Juollodibme Sámedikkerádes tjuovvu vuorodimijt Muohtatjalme-tjielggidusán, Sámedikkeráde álgadimtjielggidus, gånnå dættoduvvá duola degu man ájnas le bærrájgæhttjat sáme giela gulluji ja aneduvvi.  

Ságájdahtátjit jali gatjálvisájda, válde aktijvuodav sámedikkerádijn Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no

 

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!