PRM: Vuostasj sáme boatsojæládusláhkajuogos la nammaduvvam

– Mij mihástallap gå ållu vuostasj sáme láhkajuogos la nammaduvvam dálla, javllaba  sámedikkepresidænnta Aili Keskitalo ja VBR åvdåk Ellinor Marita Jåma. Sámedigge ja Vuona Boatsojsámij Rijkasiebrre (VBR) li nammaduvvam láhkajuohkusav mij galggá boatsojæláduslágav gehtjadit.

Ođas | Almmuhuvvon , ođasmahtton

Reindrift-C-Aina-Bye_mainimage.jpg
FOTO | Foto: Aina Bye/Sametinget

Sámedigge ja VBR li avtamielaga juohkusa mandáhta birra.

– Juogos galggá sisŋeldis vidjurijt boatsojæládusán gehtjadit, ja máhttá oajvvadit ájn vil rievddadimijt ma tjårggi prosessajt ma li tjanádum ja majn la legitimitiehtta boatsojæládusán. Juogos galggá aj sieradusájt priváhtariektá stivrrima ja almulasj riektá háldadime gaskav gehtjadit, ja aj sijdaoase sajev merustallat. Juogos galggá oajvvadit rievddadimijt ma lulun tjårggit boatsojæládusá arealsuodjalimev, ja gehtjadit lága mærrádusájt boatsojlågoj gáktuj, javllá sámedikkepresidænnta Keskitalo.

– Ájnas la lágav avtatraják guoradallat ja dættodit æládusá åtsådallamijt boatsojæláduslágajn mij ij ållida álmmukrievtesvuoda dássáj. Ållu konkriehta árvvalusájt oadtjot man láhkáj lágav luluj rievddaduvvat álkkebun dahká dåjmalattjat Stuorradikke gáktuj barggat dárbulasj láhkarievddadimprosessa gáktuj, javllá VBR åvdåk Ellinor Marita Jåma.

Sámedikkeráde Silje Karine Muotka vuoset dasi, Ednambarggo- ja biebbmodepartemænnta luodjom láhkáj la iehpe-avtatraják láhkaprosessaj láhtjám gånnå boatsojæláduslágav muhtem mærráj galggá rievddaduvvat ja juogadam paragráffas paragráffaj.  

– Sámedikke l bivddim guovdásj oajválattja nammadittjat láhkajuohkusav, valla EBD vuojnnet vilá sávvá lágav rievddadit juogaduvvam prosessan. Dan diehti mij dálla nammadip ållu vuostasj sáme láhkajuohkusav, javllá Muotka, guhti mielastis la ållu riekta dát dáhpáduvvá boatsojæládussuorgen.

– Boatsojæládus la tjielgga álggoálmmukæládus, ja sáme perspektijva ja vuojno hæhttuji bærrájgåtseduvvat nannitjit dårjav sáme álmmugis ja boatsojæládusás.

Juogos mij galggá barggat åbbålasj tjadádimijn boatsojæláduslágas li tjuovvovasj ulmutja:

Ragnhild Marit Sara – juohkusa åvdåk, jurissta
Kirsti Strøm Bull, professåvrrå, dr.juris
Samuel John N. Anti, ælloniehkke
Nils Per Jåma, ælloniehkke
Ellen Inga Turi, guoradallam- ja åhpadusdirekterra, dr.philos
Nils Mikkelsen Utsi, advokáhtta, sámedikkeájras ja ælloniehkke
Anna Ravna Gaup, ælloniehkke
Mattias Åhren, professåvrrå, dr. juris
Ellen Sara Sparrok, ælloniehkke

– Mij aj mihástallap gå la tjiehpes sáme nissun jurissta; Ragnhild Marit Sara gut láhkajuohkusav jådet, javllaba sámedikkepresidænnta Keskitalo ja VBR åvdåk Ellinor Marita Jåma.

Basádismáno 29. biejve Sámedikke bivddi fáhkaseminárraj Altan gånnå iesjgeŋgalágásj tjuolma gå iesjmierredibme ja dálásj hásstalusá tjanáduvvam boatsojæládusláhkaj li vuodon.

– Bivddim seminárran maŋŋela boahtá, valla danna juohkusa åvdåk álgadibmáj hoallá. Dát la stuorra barggo, valla jus boatsojæládusá berustime galggi bærrájgåtseduvvat boahtte láhkarievddadimijn, hæhttup mij dán prosessav tjadá mannat, låhpat Muotka. Sån javllá dåjmadahka sjaddá Sámedikken ja juogos galggá gærggat åvddåla guokta jage la vássám.  

Jus li gatjálvisá jali ságájdahtátjit, guládalá:

* Sámedikkepresidænnta Aili Keskitalo, +47 971 29 305
* VBR åvdåk Ellinor Marita Jåma, +47 916 13 460
* Sámedikkeráde Silje Karine Muotka, +47 984 87 576

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!